相傳呢支叫做「鑽石能量水」嘅支裝水,係為魚翅航空空姐空少帶黎好多煩惱嘅源頭...做開魚翅嘅朋友或者會知道,長途航班每個做商務艙同埋特選經濟艙嘅乘客都會獲發一支「鑽石水」,同時菠蘿會嘅鑽石會員都會一人一支...之所以有又死冇又死就係因為其他冇水嘅乘客就會問我地拎一支,但問題係
1.我地真係冇咁多支啦
2.我今次有多比到你,咁下次冇的話你咪要投訴?
話說有一日派完餐,有個男乘客氣沖沖咁衝入黎我地廚房
客人「比支水我」
同事「唔好意思呀,我地要去其他客艙睇下有冇,麻煩你等一等」
客人「你呃人!!!冇理由冇架!!!我要細水,隔離個男人都有」(隔離係鑽石會員)
同事「係,我明白,我宜家去幫你搵一搵,好唔好?」
客人「你地呀唔公平呀,佢唔出聲你就比佢,我出聲你都唔比我呀,仲有呀你地d死人水飲死人架,你叫我點入落肚呀?飲完可能會即刻嘔呀會死架,我一杯都飲唔落呀,你地自己都唔飲啦,一定收埋唔比我留返比自己飲」
呢個時候,呀哥同豆腐打左個眼色,喺水喉倒左兩杯水出黎,然後喺呢位客人面前「一.飲.而.盡」再倒多杯再飲多杯,呢個客人睇見我地隊左兩杯水之後就9秒9衝返出去再坐低左冇再話要支裝水 😏😏😏😏😏
老實講,首先,呢個「水喉水」係唔會飲死人,亦都唔會即刻嘔,係適合飲用嘅,第二,豆腐有時候寧願飲「水喉水」都唔想飲EVIAN,因為飲得多會甩頭髮架啵,再者就算有剩,我比你就人情唔比你就道理,都係嗰句囉你咁嘅態度我有都唔比你啦!!!
最後臨降落,呀哥突然拎住支1.5公升嘅支裝水比呢位先生,再同佢講因為冇細支得大支,希望佢可以「袋住先」飲住先喎!!! 呀哥,你係我偶像呀!!!
Search